Olmaliq kon-metallurgiya kombinati 70 yoshda
2019-yil 24-oktabr kuni Olmaliq kon-metallurgiya kombinati aksiyadorlik jamiyati tashkil etilganiga 70 yil bo‘ldi.
0053hu munosabat bilan bugun erta tongdan Toshkent viloyati Olmaliq shahri ko‘chalarida, kombinat mehnat jamoalarida bayram sayllari, ma’naviy-ma’rifiy, ko‘ngilochar tadbirlar boshlanib ketdi.
Ma’lumotlarga ko‘ra, shonli sana munosabati bilan subhda boshlangan bayram tadbirlari kechki paytga qadar davom etishi, tantanali tadbirlarda hukumatimiz, turli vazirlik va idoralar rahbarlari ishtirok etishi kutilmoqda.
Jumladan, bayram tadbiri mehmonlari kombinat tarix muzeyiga tashrif buyurib, muzey faoliyati bilan tanishadi.
“Metallurg” madaniyat saroyida qutlug‘ ayyom munosabati bilan tantanali yig‘ilish o‘tkaziladi. Mazkur yig‘ilishida kombinatning bir guruh faol ishchi-xodimlariga hukumat mukofotlari ham topshirilishi rejalashtirilgan.
“Oltin olma” xiyoboni hamda “Delfin” akva parki atrofida kombinat tomonidan tayyorlangan ishlab chiqarish jarayonini aks ettiruvchi eksponatlar, modellar va maketlar ko‘rgazmasi tashkil etiladi.
Kombinatning 70 yilligi uchun tayyorlangan maxsus doshqozonda O‘zbekiston oshpazlar uyushmasining mohir oshpazlari tomonidan 5 tonnalik osh damlanadi. Milliy taom kombinat mehnat ahliga, Olmaliq shahri aholisiga, tadbir mehmonlariga hamda Bolalar uylariga tarqatiladi.
Kechki payt esa kombinat sport majmuasida o‘zbek estradasi yulduzlari ishtirokida katta bayram konserti o‘tkaziladi. Bayram tadbirida shuningdek, mushakbozlik bo‘lishi kutilmoqda.
“Metallurg“ madaniyat saroyida shonli sana munosabati bilan tantanali tadbir o‘tkazildi. Unda O‘zbekiston Respublikasi Bosh vaziri A.Aripov, Toshkent viloyati hokimi vazifasini bajaruvchisi R.Xolmatov, sanoat sohasi olimlari, xorijlik mehmonlar, kombinat ishchi-xodimlari, keng jamoatchilik vakillari ishtirok etdi.
Tantanali tadbir avvalida Bosh vazir A.Aripov Prezidentimizning kombinatning 70 yilligi munosabati bilan yo‘llagan tabrigini o‘qib, eshittirdi.
Olmaliq kon-metallurgiya kombinatini texnik va texnologik jihatdan modernizatsiya qilish, ishlab chiqarish jarayoniga dunyoning ilg‘or zamonaviy texnologiyalarini, yetuk mutaxassislarni jalb etish borasida tizimli ishlar amalga oshirilmoqda. Pirovardida, kombinatning ishlab chiqarish samaradorligi va sifati ortmoqda. Jumladan, kombinat va uning tarkibiy bo‘limlarida 36 mingdan ziyod ishchi-xizmatchi mehnat qilayotgan jamiyat tomonidan joriy yilning 9 oyida qiymati 1 milliard 400 million dollardan ortiq mahsulot ishlab chiqarildi. Shu davrda o‘sish o‘tgan yilning mos davriga nisbatan 131,5 foizni tashkil etdi. Ayniqsa, katodli mis, rux, oltin, kumush ishlab chiqarish hajmi sezilarli darajada ortdi.
Tantanali tadbir doirasida Prezidentimizning shonli sana munosabati bilan e’lon qilingan maxsus farmoniga muvofiq, davlatimizning yuksak mukofotlari bilan taqdirlangan kombinat xodimlariga mehnatlari rag‘bati – mukofotlar topshirildi. Taqdirlangan sanoatchilarga mukofotlarni O‘zbekiston Respublikasi Bosh vaziri A.Aripov topshirdi.
Bayram tadbiri musiqiy dasturga ulanib ketdi. Olmaliq shahrida bayram tadbirlari davom etmoqda.
O’zA
