Ўмондаги Султон Қобус университетининг Исломшунослик кафедраси профессори Сайф бин Салим ал-Ҳадидан давлатимиз раҳбар ташаббуси ва ғояси асосида Тошкент шаҳрида барпо этилаётган Ўзбекистондаги Ислом цивилизацияси маркази ҳақидаги фикрларини билдирди.

Ўмондаги Султон Қобус университетининг Исломшунослик кафедраси профессори Сайф бин Салим ал-Ҳадидан давлатимиз раҳбар ташаббуси ва ғояси асосида Тошкент шаҳрида барпо этилаётган Ўзбекистондаги Ислом цивилизацияси маркази ҳақидаги фикрларини билдирди.

– Яқинда диний-маърифий соҳага доир йирик конференцияда иштирок этиш учун Ўзбекистонда бўлдим. Мазкур анжуманда Ислом олами ва бошқа мамлакатлардан кўплаб олимлар иштирок этди.

Сафар давомида Ўзбекистонда маънавий-маърифий ва диний жабҳада жуда катта янгиланишлар рўй берганига, йирик таълим ва илмий-тадқиқот марказлари ташкил этилганига гувоҳ бўлдим. Ана шундай йирик лойиҳалардан бири – бу Ўзбекистондаги Ислом цивилизацияси марказининг бунёд этилаётганидир.

Ушбу марказ экспозицияси кўплаб ислом илмлари ва гуманитар фанларга оид ноёб материаллар билан бойитилмоқда. Айниқса, Ўзбекистон заминидан етишиб чиққан буюк олимларнинг бой мероси ва улар ҳақидаги муҳим маълумотлар баркамол авлод тарбиясида жуда муҳим аҳамият касб этади, деб ўйлайман.

Эътиборлиси, мен иштирок этган конференция ҳам "Ўзбекистон олимлари – Учинчи Уйғониш даври асоси" номи остида ташкил этилди.   Ўзбекистондаги Ислом цивилизация марказининг бунёд этилиши ўзбек халқининг бой меросига қайта мурожаат қилиш ва унинг мавжудлигини таъкидлашга ишорадир.

Шунингдек, мамлакат бутун дунёга Ўзбекистоннинг қадимий меросини кенг тарғиб қилмоқда. Чунки, бу мерос нафақат мусулмонлар учун, балки бутун инсоният учун муҳимдир. Агар биз илмий билимлар, хусусан когнитив, табиий ва экспериментал фанлар ҳақида гапирадиган бўлсак, Ибн Сино, Ал-Фаробий, Абу Райҳон Беруний ва бошқа олимларни ёдга олмасликнинг иложи йўқ.

Ислом илмлари, масалан, фиқҳ ва ҳадис ҳақида гапирганда, эса Ал-Бухорий, Ат-Термизий, Аз-Замахшарий, Аш-Шоший каби аждодларингизни алоҳида санаб ўтиш жоиз. Бу номлар дунёда ва ислом оламида жуда катта мавқега эга. Улар, шунингдек, Ўзбекистон замини мусулмонлар учун муҳим марказ эканлигини англатади.

Биз келажакда Ўмон ва Ўзбекистон ўртасидаги ҳамкорликни янада жадаллаштиришга барча имкониятларимизни сафарбар этамиз. Хусусан, Султон Қобус университети Ўзбекистон олий таълим муассасалари билан талабалар алмашинуви, ўзаро ташрифлар, форумлар, конференциялар семинарлар ва илмий-тадқиқотлар ўтказиш йўналишида ҳамкорликка тайёр.

Ишонч билан айтишим мумкинки, Ўмон ҳар доим ўзбек халқининг бой тарихи ва буюк меросини эътироф этади ва уларни тарғиб этишда қўллаб-қувватлайди. Шунингдек, Ўмон Ўзбекистон билан барча даражадаги яқин алоқаларни чуқурлаштиришга интилади.