Siyosiy munosabatlar

O‘mon Sultonligi O‘zbekiston Respublikasining davlat mustaqilligini 1991-yil dekabrda tan olgan. 1992-yil 22-aprelda mamlakatlarimiz o‘rtasida diplomatik munosabatlar o‘rnatilgan.

2009-yil oktabr oyida O‘zbekiston Respublikasi Birinchi Prezidenti I.A.Karimov davlat tashrifi bilan O‘mon Sultonligida bo‘ldi. Tashrif chog‘ida 19 ta hukumatlararo va idoralararo hujjatlar imzolandi.

2010-yil aprel oyidan Toshkentda O‘mon Sultonligining elchixonasi faoliyat yurita boshladi. 2018-yil iyul oyidan boshlab O‘zbekiston Respublikasining Masqat shahridagi elchixonasi faoliyat ko‘rsatmoqda.

2014-yilning 6-avgustida Tashqi ishlar vaziri Abdulaziz Komilov boshchiligidagi O‘zbekiston delegatsiyasi O‘zbekiston-Turkmaniston-Eron-O‘mon transport yolagini yararish bo‘yicha to‘rt tomonlama vazirlar uchrashuvida qatnashdi (Masqat, O‘mon). Uchrashuv doirasida Tashqi ishlar vaziri Abdulaziz Komilov O‘mon Tashqi ishlarga mas’ul vaziri Yusuf bin Alaviy bilan uchrashdi.

2018-yil 15-mart kuni O'zbekiston Respublikasi Bosh vaziri A.Aripov va O‘mon meros va madaniyat vaziri Haisam ibn Tariq al-Said O‘mon tomonining moliyaviy yordami bilan qurilgan Abu Rayhon Beruniy nomidagi Sharqshunoslik institutining yangi binosining ochilish marosimida ishtirok etdi.